如．夢遊記: 2006-06-02(五)．微雨．九份

今朝起身, 又落雨, 原本之前諗住今日6點起身先去十分瀑布再金瓜石,跟住先去九份,夜晚去基隆夜市。不過之前落左咁多日雨, 蕾蕾姨媽話去十分瀑布會危險, 同埋起身都落緊雨, 所以決定唔去, 咁我o地仲可以訓遲d, d 時間可以flexible d。(原本話九份係山, 又多石級, 叫我o地九份都唔去, 不過咁就冇咩地方好去, 同埋o個度旅遊區, 10點到又開始停雨, 所以就照去九份。)

首先我o地搭捷運去台北車站, 再轉火車。係火車站見到唔少奇怪野...例如,"身心障礙電梯"....連心有事都歧視....上車時我o地上左女性專用車廂, 但係.....坐我o地隔離的就係一個大男人.....之後車長查飛都冇理佢, 連個車長最尾都坐埋係呢個車廂度......跟住每隻車門旁都有個牌寫話如果車門關唔到, 就掛上條鏈, 以策安全, 牌下面就係一條好粗的鏈.....

去金瓜石的黃金博物館, 向我o地的尋金之旅出發。......點知, 未見到舊金, 我o地的黃金夢就破滅左......!! 竟然尋日開始休館12日...嗚...

冇野睇, 唯有返九份, 九份都幾多野食, 淡水好多鐵蛋同魚穌, 九份就好多麻薯。九份個樣有d 似調景嶺, 又係一條窄的街, 有野食, 有好多石級, 係一座山同好多斜路。九份都有唔少日本人, 有個台灣人仲以為我o地係日本人, 同我o地講英文, 哈哈。我仲買左成4個陶笛添, 好靚好得意。

夜晚我o地終於可以自己食晚餐啦, 係屋企附近的"好一個夢餐廳"到食, 入到去發覺出事...會唔會入左黑店, 台灣人雖然好早食飯(6點食...), 但都冇理由2層樓高的餐廳竟然得我o地2個客!!況且都只不過係7點到...d野食都一段時間先送到尼, 個貌相都唔差, 食落又幾好味喎, 可能因為冇客, 所以落單先煮, 意粉彈牙, 好好味。雪糕以為會係細細舊的, 點知勁大舊, 仲好靚, 咖啡聽聞都好靚, 不過我去左廁所, 蕾蕾等唔澈就攪拌左杯咖啡, 冇得睇。台灣食野都唔平, 不過自己2個食, 開心好多, 輕鬆好多, 哈哈。

呢日應該係成個台灣之旅最好玩的一日。